خلال الفترة اللي فاتت تعاملت مع عدد من المصالح الحكومية لتخليص شوية اوراق .. والحقيقة أنا حابب أنقل الخبرة دي لحضراتكم في شوية قواعد أكتسبتها ..
1- هات معاك كل الصور والأصول المتعلقة بكافة تفاصيل حياتك واتحرك بيهم، حتى لو مش مطلوبة وجودك قدام الموظف حمل عليه وهوا عايز يطرقك بأي طريقة، لذلك سد عليه كل منافذ أنه يطرقك وهات كل الوثائق اللي تعرف تجيبها .. لو تقدر تجيب شهادة نجاح جدك في الإبتدائية هاتها ..
2- مفيش في مصر طابور .. فيه كورة بتتلم ع المكتب او الشباك .. ما تعملش فيها أفندي وتسأل الطابور فين .. أدفس نفسك في الكورة واستغل كل الفراغات الممكن علشان تدفس نفسك ..
3- صدقني مفيش حد مزاجه لامؤاخذة في الرجالة ( أو مزاجها في الستات ) حيقف يشقط في طابور مصلحة حكومية .. تبرع بمؤخرتك لوجه الوطن .. ولا تخشى عليها فهي في يد أمينة
4- خدعوك فقالوا إن الناس سواسية .. الناس مش سواسية .. خلق الله ضباط الشرطة، ثم رجال القضاء، ثم وكلاء النيابة، وبعدها خلق بقية العالم .. أي ( ضابط، قاضي، وكيل نيابة ) ممكن ببساطة يخلصلك الورق اللي حتقعد فيه أسبوعين في مكالمة تليفون دقيقة واحدة .. أبحث عن هؤلاء وسط اقاربك ومعارفك القديمة كما تبحث عن الأبرة في كومة قش.
5- لا يوجد مصلحة حكومية واحدة وحيدة ليس فيها الموظف اللي بينجز .. كلما أرتفع صوت الموظف متحدثاً عن النظام والأخلاق والفضيلة فهو الموظف اللي حياخد اللي فيه النصيب ويمشيلك مصلحتك .. أبحث عنه .. خده على جنب ( مش قدام الناس ) وسايسه كده واحدة واحدة .. وأظرفه الفلوس بشياكة .. ( اللي حيقول حرام في التعليقات حعمله بلوك ).
6-عزيزتي الفتاة .. كل موظفي الحكومة حيحانين .. أناقتك، الميكب التقيل بتاعك، صوتك الرقيق المسهوك، صراخك كل شوية .. ” يا كمااعة ما ينفعش كده اووف ” حيخلوكي تخلصي مصلحتك قبل الراجل اللي مستني من أسبوعين .. الموظف حيتنطر من على مكتبه علشان يخلص حاجتك بسهولة ويسر .. ( زيارتك للكوافير قبل الذهاب لمصلحة حكومية ستساعدك فوق ما تتخيلين ) ..
7- عزيزتي الفتاة .. اسألي دوماً عن طابور السيدات .. حتى لو فيه طابور سيدات زعقي كده وقولي .. إزاي مفيش طابور للسيدات واعملي طابور لوحدك .. ع الشباك ..
8- باقة الإنترنت، السماعة، الموبايل المشحون، إزازة المية الساقعة، رفاق الرحلة الطويلة .. أستمتع وأقضي أوقات فراغك .. وتذكر دوماً أن الصبر مفتاح الفرج.
9- الموظفة الاربعينية اللي بتزعق دي غالبا بتبقى ضحية زوج بكرش قاعد بالسلب والفانلة الحمالات قدام المروحة بياكل بطيخ في البيت.. لم يبتسم أحد في وجهها منذ سنوات .. خليك جان .. ابتسم في وشها .. وكل ما تكلمك قولها ميرسي أوي لذوقك يا فندم .. قلبها حينفتحلك على طول ..
10- على باب الجامع بتقلع جذمتك، وعلى باب المصلحة الحكومية بتخلع كرامتك .. لو حصلت خناقة بينك وبين موظف الحكومة وضربتوا بعض لا قدر الله .. فهوا حياخد خصم يومين .. وانت حتاخد تلات سنين سجن ( إعتداء على موظف عام اثناء تأدية وظيفته ) .. عديها .. الكلمة الوحشة ما بتلزقش .. كرامتك ع الباب في الحفظ والصون .. لما تلبسها تاني وانت طالع حتلاقيها زي ما هي لا كرمشت ولا اتبقعت.
11- الأختام والتوقيعات .. ثم الأختام والتوقيعات .. لو تطول تخلي الموظف يختملك على قورتك خليه يختملك .. لو تطول تخليه يوقعلك على كف ايدك خليه يوقع .. ودايما دايماً اسأل الموظف قبل ما تمشي .. خلاص كده ؟؟؟ .. يعني مفيش ختم ناقص ؟؟ .. طيب مفيش توقيع ؟؟ .. أروح ؟؟ .. بجد ؟؟ أروح فعلاً ؟ ..
12- راجع ورقك قبل ما تمشي .. أنا شغال معد برامج تليفزيونية .. اتكتب لي في البطاقة ( أخصائي برامج آلية ) ، وبعدين صلحتها فاتكتبت لي ( معهد برامج تليفزيونية ) فصلحتها وطلعت صح !! كنت مستغرب اوي .. أما أسمي فتحول بقدرة قادر في شهادة التحركات من محمود حسن لمحمود حسب .. بينما ظهرت في نفس الشهادة كل البلدان اللي ما رحتهاش نهائياً والبلدان اللي رحتها أصلاً ما اتكتبتش ..
13- دوماً هناك مكان خفي وفاضي بيخلص الورق لأصحاب المكانات الإجتماعية المرفهة .. لو كنت عضو في نادي من الأندية اللي عضويتها بتبدأ من ( 100 ألف جنيه ) .. حتلاقي غالباً شهر عقاري هناك، حتلاقي أحوال مدنية، ومش بعيد تلاقي مكتب لرئاسة الجمهورية في النادي .. أبحث دوماً عن هذا المكتب الخفي .. وأنسى انك خرجت في يوم تنادي ( عيش، حرية، لامؤاخذة عدالة أجتماعية ).
نكتفي بهذا القدر .. وأعلم عزيزي أن الخارج من هذه البلاد مولود فأهرب منها .. وأن مفيش مصري حيخش جهنم علشان إحنا أصلا عايشين فيها .
محمود حسن، مدون ومعد أفلام وثائقية وناشط سياسي، يكتب في 18 سبتمبر بموقع فيس بوك عن خلاصة تجربته في إنهاء الإجراءات الحكومية، منتقداً بسخرية تعقيداتها غير المنطقية.
للإطلاع على النص الأصلي:
https://www.facebook.com/mahmoud.hassan.355/posts/10152409777756378