أنا بقي مشكلتى مع الجيش

في يوم التدوين عن المجلس الأعلى للقوات المسلحة كتب علاء سيف هذه التدوينة التى يوضح ويفصل فيها أبرز ملاحظته على أداء المؤسسة العسكرية خلال الفترة الانتقالية. علاء واحد من أوائل المدونين المصريين والعرب كمان أنه يعتبر المؤسس الأول لمجمع المدونات المصرية العمرانية

مدونة منال وعلاء
http://manalaa.net

أنا بقي مشكلتى مع الجيش

كثير اتكلموا عن مشكلتنا مع المجلس العسكري، عن كذبة انحيازه للثورة وحمايته ليها، عن حمايته لمبارك وحاشيته وباقي الفاسدين، عن تباطئه وتواطئه ضد أهداف ومطالب الثورة المشروعة، وتدخله في عمل حكومة شرف وفي الاعلام وو و
بس أنا بقى عايز أتكلم عن الجيش، أيوه الجيش، أحنا مشكلتنا مش بس مع المجلس العسكري، أحنا مشكلتنا كمان مع الجيش، الجيش كمؤسسة في مصر بس كمان كأفراد.
من شهادات الثوار اللي اعتقلوا واتعذبوا (1)، تحس بكراهية شديدة من الظباط لينا، غل غير مفهوم، شتيمة تدل على احتقارهم التام لينا وللثورة. التعذيب مكانش تلويش وبس، في شهادة موسى (2)عذبوه وقالوله اهتف يعيش حسنى مبارك، في شهادة على صبحي (3) عذبوه وهما بيقولوا ارفع رأسك فوق انت مصري، في شهادة عفت (4) قالولهم هنربيكم يا خولات الثورة.
صحيح الجيش عماده المجندين بس ما الأمن المركزي كمان عماده المجندين ورغم أننا بنتعامل مع مجند الأمن المركزي على أنه أخ ومغلوب على أمره بنتعامل مع المؤسسة نفسها على أنها عدو لينا.
أنا معرفش نسبة الظباط اللي بيكرهونا ايه، ومعرفش شحنوا الجنود ضدنا كده ازاي، بس دي عداوة واضحة ولا لبس فيها. هل هي عداوة من جزء من الجيش بس؟ أقلية؟ أغلبية؟ ولا أعرف بس واضح أن فيه مشكلة كبيرة.
فيه مشكلة ثانية، واضح تماما ان الشرطة العسكرية والسجن الحربي بيمارسوا التعذيب بشكل منهجي، أحنا قمنا بثورة عشان كرامة المواطن، أي مؤسسة منهجها التعذيب يبقى فيها مشكلة جذرية ولازم تتصلح. بس أنا كمان عايز أفهم هو قبل الثورة وانتشار الجيش في الشوارع كان بيمارس التعذيب ده على مين؟ على مواطنين مدنيين برضه؟ ولا على مجندين؟ هو الجيش بيعذب جنوده؟ ده سؤال مهم لأن بصراحة أنا لا يمكن أبقى مطمئن أن جيش بيعذب مجندينه هيعرف يدافع عن البلد في حالة حرب.
يوم موقعة الجمل وأحنا بنحارب البلطجية اللي الجيش سابهم يدخلوا علينا ويضربونا بالنار ومرفعش سلاحه حماية لينا خالص فيه رائد اتجنن علينا وقعد يشخط فينا ويقول أنتم مش فاهمين حاجة وفيه ايرانيين بيلعبوا بيكم.
يوم اعتصام مجلس الوزراء ضد حكومة شفيق ظباط شتموا أمي ومراتي عشان ازاي بيتصرمحوا في الشوارع بعد نصف الليل!!
و يوم سفارة اسرائيل ظباط شتموا الولاد وقالوا علم اسرائيل ايه اللي ينزل لباسك اللي هينزل.
مين دول؟ ايه الخبل ده؟ ده حتى الداخلية كانت فاهمة يعني ايه مظاهرات ومكانتش بتصدق الأساطير بتاعت ايران دي، وكده بصريح العبارة بيدافعوا عن علم اسرائيل؟
هو ده جيش مين؟
مين المسئول هل هو اللي ادى الاوامر بس؟ يعني اللواء عثمان مثلا بينزل ينبه على الظباط ويقولهم دول شراميط ودول خولات وعلم اسرائيل حلو؟ اللواء بدين بينزل يقولهم اضرب وقول يعيش حسني مبارك؟
مبارك والعادلي مسئولين عن التعذيب والقتل اللي تم بيد الداخلية بس كمان الظباط اللي نفذت التعذيب والقتل مسئولة. والجيش نفس الحكاية.
مشكلتنا مع الجيش كمؤسسة أقدم من الثورة، وقبل ما نسمع عن المجلس العسكري ده. الجيش ما بطلش يتدخل في السياسة وفي شئون لا علاقة لها بتأمين البلاد من عدوان خارجي، الجيش لوائاته بتتعين في كل المناصب في البلد زيهم زي لوائات الداخلية، وطبعا مشاركين في الفساد والقمع السياسي وبيدخلوا الحزب الوطني وكل الكلام ده.
مشكلتنا مع الجيش أنه داخل في الاقتصاد والبيزنيس، اللي هو أكيد أكيد مفسدة، جيش أيه في الدنيا عنده مصانع بوتاجازات وفنادق وقاعات أفراح وبيدخل شريك في مولات ومحطات بنزين وشركة مياه معدنية؟ ايه دخل ده بالدفاع عن الوطن؟ وايه كم الفساد في الشركات دي كلها؟ وهل ظباطه مشغولين بالبيزنيس ولا بصد العدوان؟
و الأسوأ أن الجيش بيخلط التجنيد بالكلام ده، التجنيد لحماية الوطن مقبول، لكن التجنيد في فندق ولا مصنع ده سخرة، لما حد يشغلك غصب عنك وبدون مقابل أو بمقابل أقل بكثير من الأجور في السوق ده عبودية مقنعة. وطبعا تخريب في الاقتصاد كمان، أنافس ازاي أنا لو الجيش داخل بميزانيته اللي محدش يسأل عليها وبعمالة مسخرة في نفس مجالي؟
و طبعا دخول الجيش في الاقتصاد بيفتح الباب لفساد وقمع أكثر، وكلنا شفنا الجيش وهو بيحاول ينتزع أرض جزيرة القرصاية من أهلها الفلاحين اللي عايشين عليها وبيزرعوها بقالهم مئات السنين. وبيعمل ده بتهديد سلاحه وقوته.
ثورتنا قامت سلمية سلمية، ومن أهم صور سلميتها أنها قررت أنها ما تهدمش الدولة وانما تنقذ مؤسساتها وتحررها وتطهرها من براثن النظام. مؤسسة زي القضاء مثلا كان فيها الفاسد وفيها النظيف وفيها عيوب في بنيانها ومنهجية لكن اخترنا نحافظ عليها ونسيبها تطهر نفسها ووقف معانا قضاة الاستقلال. الاعلام مثلا تعاملنا بنفس المنطق رغم أننا مكناش نعرف مين شرفاء الاعلاميين ورغم أنها كانت منحازة وفاسدة أكثر بكثير من القضاء.
لكن مؤسسة الداخلية منفعش معاها السياسة دي، كان لازم نهزمها تماما ونكسر ظهرها، وحرقنا الأقسام وحاولنا اقتحام الوزارة نفسها.
الجيش عليه يقرر هل هو زي القضاء مؤسسة رغم كل اختلالها أساسها لسه سليم وفيه قيادات واضحة للتطهير واصلاح الأمور، ولا هو زي الاعلام أساسه مختل لكن أغلب العاملين فيه مش أعداء الوطن ومحتاج المجتمع يتضافر جهوده ويتدخل من خارج المؤسسة لتطهيره واصلاحه.
ولا هو زي الداخلية وما ينفعش معاه غير أن ينكسر ظهره؟
محدش فينا يحب يدخل في معارك كبيرة ثانية، ولا حدش فينا نفسه نكسر الجيش ونقعد محتاسين زي حوستنا الحالية في الشرطة، لكن الجيش ليس بالقوة لمقاومة الشعب كله ولا الشعب بالضعف اللي يخليه ما يعرفش يتصرف في غيابه. العدو الخارجي الوحيد لمصر هو اسرائيل (اللي الجيش كان بيحمي علمها) واسرائيل هزمت جيشنا مرتين وانهزمت منه مرة لكن في الثلاث مرات فشلت تهزم أهل السويس.
الاختيار للجيش، الجيش كله، كمؤسسة وأفراد مش للمجلس العسكري بس، وأيا كان الاختيار الشعب قدها وقدود.

الهوامش:
1-رابط لمدونة يوميات تحت حكم العسكر: http://tahrirdiaries.wordpress.com/
2-رابط لمدونة محمد موسى وشهادته عن التعذيب: http://bit.ly/hAc1Kq
3-رابط لشهادة على صبحى حول وقائع تعذيبه على يد قوات الشرطة العسكرية: http://ma3t.blogspot.com/2011/03/blog-post_14.html
4-شهادة محمد عفت عن أحداث مظاهرات السفارة الإسرائيلية: http://egytimes.org/2011/05/3818/

التعليقات:

Tue, 2011/05/24 – 19:23 — Anonymous (not verified)
واضح من كلامك
واضح من كلامك انك مدخلتش الجيش او دخلت وجبت واسطة ودتك فى حتة بعيد عن الجيش. احب افهمك اولا ان الجيش مؤسسة مستقلة عن ميزانية الدولة وعنده اكتفاء ذاتى يعنى بيصرف على نفسه وده طبعا عن طريق المشروعات اللى انت بتتريق عليها وفى نفس الوقت عنده عمالة زيادة بيستفيد منها.. انا واحد من الناس قضيت فى الجيش 3 سنين وكنت قبلها بفكر بسطحية زيك كده بس لما دخلت واشتغلت فى الجيش كنت مبسوط رغم ان زميلى سبقونى بره الجيش من حيث الشغل والمرتبات بس عرفت ان جيشنا بخير وان زى ما فى قاعات افراح ومصانع بوناجازات فيه تدريبات وصفقات اسلحة وتصنيع لبعض الاسلحة وتطوير معظم الاسلحة بايدى مصرية كنت واحد منهم.. ولاوم تعرف ان الجيش مرتبط بمعاهدات دوليه بتحكم كتير من الامور وان الامور مش بتتاخد عافية لانه مسئول عن حماية وطن باكمله ولا عايزنا نعمل زى ايام 67 لما كل واحد كان عامل راجل وفى الاخر خدنا على قفانا .. سيدى الاعزيز انا لا انكر انه اكيد فيه بعض الفساد وده شئ لا تخلو منه اى مؤسسة فى مصر ولكن الجيش هو اقل مؤسسه ممكن تلاقى فيها فساد ويا ريت متقومش الناس علشان شوية امور انت شايفها من وجهة نظرك ومن الافضل انك تسأل كويس .. انا من واقع خدمتى فى الجيش اقدر اقول لكل الناس ان جيشنا بخير وانه قادر على حماية مصر.
عاوز ارد على اكتر نقطتين مستفزين =D
على فكره كلامك مأفور فى حاجات كتير ومكنتش متوقع ان الكلام ده يطلع منك , حاجات قولتها صح , بس حاجات تانيه كتير غلط او عشان يمكن مش فاهمها كويس ,,الجيش شعاره يد تبنى ويد تحمل السلاح , وتفتكر وقت زى ده الجيش ممكن يعمل ايه؟
طلما مفيش حرب يعمل ايه؟ مهو لازم يشغل الناس العنده فى اى حاجه,
انه يساعد البلد فى مشاريع اقتصاديه مهما كانت فا ديه حاجه كويسة, وتعرف ان الجيش بيساهم بجزء كبير جدا من ميزانية الدولة , الجيش دولة جوه الدوله محقق أكتفاء ذاتى كل حاجه بيعملها عشان يخدم بيها ضباطه وجنوده والمدنيين طبعا , سواء كانت مشاريع صناعيه, زراعيه, نوادى ودار ضباط , ده حتى أفران العيش النظام فشل فى حل مشكلتها هو كان بيعملها بكفاءه اكبر من اى حد تانى بره وده بشهاده الجميع
واى مشكله الدوله مش قادرة تحلها كانت بتطلب من الجيش يدخل وطول ما احنا عايشين هتطلب منه يتدخل تانى وتالت
الجيش مش بيكلف الدولة غير صفقات السلاح وجزء من مرتبات الظباط واى حاجه تانيه هو بيتكفل بيها , وبيستخدم البيزنس عشان يحقق المكاسب التخليه يصرف على نفسه ويطور من نفسه والكل شاهد على جودة منتجات الجيش
وبعدين ياعنى انت عاوز ناس تحرق علم إسرائيل العلى السفارة ويقولوهم اتفضلو؟ اكيد طبعا لازم يحموه طلما قبلنا ان يبقى ليهم سفارة هنا يبقى لازم نحميها , زى ما هما لازم يعملوا مع السفارة المصرية هناك ,,,,
دول نقطتين استفزونى جدا فا أقتضى التوضيح 😀

Mon, 2011/05/23 – 23:53 — Anonymous (not verified)
توضيحات هامه
الجيش زيه زيه الشعب المصري، في مشاعره تجاه الثورة، لكن الفرق ان الضباط الي فيه مش خايفين يعبروا عن مشاعرهم السلبية تجاه الثورة ان وجدت، وفيهم الي مع الثورة وفيه الي ضدها وفيه اسفين يا ريس وفيه اسفين يا شفيق وفيهم السلفي وفيهم الاخواني، هم انعكاس متطابق لشرائح وأراء الشعب المصري، ده اولا
ثانيا، الجيش فيه سجون ومعتقلات حربية اسوأ ألاف المرات من معتقلات امن الدولة، وتخصصها الاساسي في تعذيب العسكريين وحبسهم، ومن المعروف لأي شخص القسوة والدونية في معاملة الجيش للبشر، وان الألة اهم من الجندي، وهناك ألاف الحوادث حول ذلك وكل العسكريين يعرفونها من اصغر جندي لاكبر ضابط، وفي عهد طنطاوي تحولت الشرطة العسكرية والامن الحربي للحاكم الفعلي للجيش فهو يحكمهم بالرعب والعقوبات المميته لقمع اي فكرة ولو بسيطة للتمرد او الرفض لاي شيء
و سجون الجيش غير خاضعة لاي رقابة فعلية
و تحياتي علي المقال
لقراءة المقال والتعليق عليه برجاء زيارة الرابط التالى: http://manalaa.net/node/88041