1- احنا بنتكلم عن قناة من 72 كم , 35 كم حفر جاف والباقي توسعة للقناة الاصلية , العرض 300 م وعمق 24 م .
الحفر الجاف اللي اتكلمت عنه حوالي 250 مليون م مكعب , الخبرا الهندسيين قالوا يخلص في 3 سنوات ( واخد بالك من الخبرا) والمشروع كله 5 سنوات.
ليه بقي ؟؟؟ عشان حضرتك الحفر ده ما بيتمش كده , الاول فيه دراسات تربة , وبعدين تنشيف او سحب للمياه الجوفية , والحفر نفسه بيتم علي مصاطب وبخطط عشان ما ينهارش , ده غير سند جوانب الحفر , وكل طبقة بتحتاج معدات معينة. بفرض ان الارض كلها رمل ولوز اللوز , بيقولك هيزودوا عدد الشركات الي 80 شركة !
تخيل حسب ما اتحاد المقاولين المصري اعلن ان المشروع محتاج 5000 سيارة قلاب , وحوالي 800 معدة من بلدوزر وحفار وخلافه مع العمل يوميا ما لايقل عن 20 ساعة.
تعرف يعني ايه كل العدد ده بيشتغل في مشروع ؟ تقدري تقولي هتنظم ازاي حركتهم والاستفادة القصوي منهم ؟ طب تقدر تقولي هتودي ناتج الحفر فين ؟
2- الاطار الزمني : حضرتك اي مشروع في الدنيا ليه وقت امثل لتنفيذه , وده بيوصلنا نقطة اسمها ال breakeven point وهي نسبيا مع التكلفة , يعني انا بفهم بحكم المشاريع العملاقة اللي انا اشتغلت فيها , لحد 10 مليار دولار , ان كل ما تضعط الوقت التكلفة بتزيد اضعاف الوقت مش نسبيا معاه , يعني المشروع اللي ممكن يتكلف جنيه في 3 سنين لو عايزه في سنة ممكن يتكلف خمسة ! وبعدين ايه الفايدة من اساسا من الضغط , ولا هو فرد عضلات وخلاص . حضرتك عدد الشركات اللي ممكن تشتغل في المشروع ده في مصر 125 شركة بس ( ده كلام اتحاد المقاولين) تخيل بقية مشاريع البلد اللي وقفت بسبب انك اخدت 80 شركة منهم . وعلي فكرة ماحدش هيشتري معدات مخصوص عشان المشروع عشان هو سنة واحدة.
3- التكلفة والتمويل : تكلفة الحفر المعلن عنها واللي هيا 4 مليار دولار حسب كلام السيسي و8 مليار حسب كلام مميش . ايه الداعي اني اضغط عشان اضاعف التكلفة , في حين انا لحد دلوقتي مش عارف التمويل منين ؟ بفرض ان المقاولين مش هتقبض وبفرض فيه اكتتاب .
طب البنوك هتدفع , قولي ازاي ؟؟ وهي البنوك عندها كل ده ومن غير دراسات جدوي وايه الinterest rate وهيعود عليهم فيه ايه ؟؟؟
4- الجدوي الاقتصادية : اكيد لكل مشروع دراسة جدوي , انا عايز اعرف ازاي نشبة المرور هتزيد 259 % , في حين لا يوجد ليك منافس اصلا اللهم رأس الرجاء الصالح اللي هياخد 4-5 ايام؟ يعني كده كده جايلك , وتقليل وقت المرور مش هيفيدك , طاقة القناة الحالية 60 سفينة بيعدي منها 45 سفينة يوميا.
5- الخلاصة :
تحميل الدولة عبء مشروع زي ده ومضغوط كمان في فترة انت في ازمة اسمه سوء ادارة . مش عايزين نعمل توشكي تانية
المشروع هيعطل المشروع الأم والأهم واللي هو محور قناة السويس , وهيأجل تنفيذ مراكز لوجيستية , وده هيصب في مصلحة أسرائيل والاردن لحد ما يخلصوا المشروع البديل بتاعهم.
6- الحلول : فيه مقترحات اتقدمت عشان ترفع كفاءة القناة الحالية عشان تستوعب انواع جديدة من السفن تقوم المرور يزيد
فيه حاجه اسهما “التربل ايز – Triple Es” دا نوع جديد طالع من السفن العملاقة بتشيل حوالي 18 ألف كونتينر وارتفاعها حوالي 20 دور .. والعالم كله بدأ يتجه ليها في النقل علشان ااقل في التكلفة والمجهود والخطر كمان .. النوع دا بينقل البضاعه لمكان معين وبيقف في 5 محطات استراتيجية في العالم ينزل بضاعة والسفن بتنقل منه وبعد كدا بينزلها وبتيجي سفن أصغر تاخد الكونترنات دي تنقلها لكل دوله ع حدة بقي .. طيب انا كمصر استفيد من دا ازاي؟؟؟
-انت عندك في مصر مشروع تم افتتاحه من كذا شهر اسمه “شرق التفريعه” ودا في بورسعيد .. دا باجماع كل الشركات الملاحية في العالم انه انسب مكان في الشرق الأوسط علشان يكون المحطة اللي تقف في السفن دي زي، الميناء دا معمول بتكنولوجي كويس جدا نقدر نستغلة بشكل مميز .. في مشلكة واحده فيه ان العمق بتاع الميناء دا 15 متر في حين السفن دي محتاجه عمق 18 م .. كمان الأوناش اللي موجودة في الميناء مصممه للسفن الأصغر منها فحتتاج أوناش أكبر شويه .. طيب الليله دي تكلف كام؟؟ هتكلف أأقل من 2 مليار دولار وهتاخد تنفيذ حوالي 6 شهور وهتتضاعفلك دخل قناة السويس الحالي 3 مرات وهتعمل دخل للميناء نفسه حوالي 5 مليار سنوي وتقدر من الدخل دا تعمل اللي انت عايزه بعد كدا.
– وطبعا علشان أهمية المشروع دا وقد ايه هو رائع اسرائيل دلوقتي شغاله علي تطوير مينائي (اشدود وحيفا) علشان تعمل المشروع ويكونو هما المركز اللي هتقف فيه السفن دي .. رغم ان مواقع المواني دي لا تقارن بميناء شرق التفريعة، ودخل علي طول الخط دلوقتي قناة بنما بتحاول تظبط اومرها هي كمان وتطور القناة علشان تجذب التربل ايز .. طيب ازي نسيب حاجه زي دي من ايدنا ومكسبها سريع .
– دي خبرتي من مشاريع عملاقة كتيرة , وبرضه ما يضرش اني افكركوا واتنك عليكوا واقولكوا اني رئيس وفد مصر في لجنة الايزو اللي كتبت الايزو لادارة المشروعات , وممثل الشرق الاوسط في الاتحاد العالمي لأدارة المشروعات.
المهندس المصري سعد حجازي يكتب في 16 أغسطس رأيه الفني الذي يوجه انتقادات لما وصفه بسوء الإدارة في مشروع قناة السويس، محذراً من فوات فرص أفضل بكثير، وتحول المشروع إلى “توشكى” جديدة يما تمثله من إهدار وفشل.
للإطلاع على النص الأصلي:
http://on.fb.me/1mGcLOI