الحرية لأحمد مندور، وليه مهم تعرف إنه مش أخوان؟

النهاردة يوم للتدوين عن احمد مندور والمطالبة باطلاق سراحه.

احمد مندور شاب يساري، عضو في حزب التحالف الشعبي الاشتراكي بقاله اربع شهور محبوس احتياطيا على ذمة قضية مظاهرات رمسيس بتاعت يوليو، قصته بالتفصيل وتعريف بيه هنا:

https://www.facebook.com/tamer.qenawy/posts/608940172486373

. مندور تهمته انه إخوان مشارك في مظاهرة للأخوان، مندور بكل وضوح مش اخوان ومكانش مشارك في المظاهرة بس كان موجود قرب ميدان رمسيس واتقبض عليه بالغلط، فيه ناس مضايقة اننا بنوضح انه مش أخوان لأن اغلب المعتقلين من مظاهرات الأخوان ابرياء مرتكبوش اي جرائم واحتجازهم غير قانوني لأن الأصل في الأمور ان المتهم بريء حتى تثبت ادانته، ولا يجوز تقييد حريته بدون حكم قضائي إلا في أضيق الحدود لحماية التحقيق. هو يعني لو اخوان حلال حبسه؟

بس أنا مهتم تعرف إن مندور مش إخوان لأكثر من سبب

مهم تعرف إن مندور مش أخوان لأن فيه ناس مصدقة أن السلطة العسكرية، بشرطتها، ومحاكمها، ونياباتها، وحكومتها، وإعلامها، وباقي الواجهة المدنية بتحارب إرهابيين إسلاميين خطر على امننا، والقبض على مندور اللي اكيد مش اخوان دليل على ان ده مش حقيقي، وإن السلطة مشغولة بالقمع والسلام.

مهم تعرف إن مندور مش اخوان لأن فيه ناس مصدقة إن السكوت على اعتقال متظاهرين عشوائيا في مصلحتهم، بما ان المتظاهرين دول بيتظاهروا عشان سلطة سقطت شرعيتها، القبض على مندور اللي اكيد مش اخوان ومكانش في المظاهرة دليل على ان العشوائية يعني عشوائية بجد وممكن اي حد يتحبس أو يتقتل بالغلط، مش بس الناس اللي انت قررت تتجاهل حقوقهم. لو سكت على اعتقال تعسفي للأخوان هيعتقل مندور، ولو سكت على اعتقال مندور بكره يعتقلوك انت.

مهم تعرف كمان ان السلطة عارفة كويس قوي ان مندور مش أخوان، مندور عضو في حزب مشارك في جبهة الانقاذ، رئيس حزب التحالف، ونائب رئيس المجلس القومي لحقوق الانسان اللي عينه في المنصب ده السلطة الحالية اتصل بنفسه بكل الوزراء وبالنائب العام وحلفلهم ان مندور عنده في الحزب ومش اخوان. تحريات المباحث اكدت ان مندور مش اخوان. ومع ذلك النيابة والقضاء مصرين مندور يفضل محبوس مع الأخوان اللي هو معارض ليهم، عشان النيابة والقضاء والداخلية قرروا انهم يربوا جيل كامل بغض النظر عن اي انتماءات، طالما تبع الثورة ووقع تحت ايدينا يبقى هنقول عليه اخوان وارهابي.

أنا مهتم تعرف إن مندور مش إخوان لأكثر من سبب

مهم تعرف أن نضال مندور يختلف تماما عن الأخوان. احنا عرفنا مندور كمؤسس لحملة احياء بالاسم فقط، دي حملة قايم بيها مجموعة من شباب الثورة للتضامن مع قضايا سكان الأحياء المهددة لصالح الكبار، ايا كان مهددة بالازالة عشان رجال الأعمال تبني مطرحها فنادق وابراج زي رملة بولاق، ولا مهددة بالمصادرة من العسكر عشان تدخل ضمن امبراطوريتهم الاقتصادية زي في جزيرة القرصاية، ولا مهددة بالزوال بسبب الاهمال والاستهبال الحكومي زي الدويقة، ولا مهددة بسبب انعدام الخدمات وتسكين الناس بدون تقنين اوضاعهم زي مساكن السلام.

مندور اشتغل على كل القضايا دي بنفسه، وشارك في تأسيس الحملة دي عشان قناعته أن الثورة ثورة شعب، وبالذات الكادحين منهم، وان شباب الثورة لن ينصر الا بنصرة اللي بيثور عشان سقف واربع حيطان، عشان لقمة عيش كريمة، عشان حتة ارض يعيش منها.

مندور مش بس مش أخوان، مندور مينفعش يكون اخوان، الأخوان في السلطة اعادوا احياء مشروع القاهرة 2050 اللي بيهدف لتشريد الملايين اللي كان بيدافع عنهم مندور، المشروع ده عملته عصابة جمال مبارك وبدأت مشاكل اهالي رملة بولاق ومثلث ماسبيرو ومناطق ثانية كثير معاه، والثورة عطلته، وحكومة قنديل رجعته بمباركة رجال الأعمال بتوع مكتب الارشاد.

رملة بولاق، القضية اللي عرفنا مندور من خلالها تفجرت لما الداخلية اشتبكت مع أهالي الرملة، لحماية مصالح ابراج النايل تاورز. مرسي وحكومته أيدوا ودعموا داخلية احمد جمال الدين وهي بتفرم اهالي الرملة، بعضهم لسه محبوس على ذمة قضية، كان يقدر نائب عام الاخوان يخلصها بس اختار يسيبهم يتحبسوا.

قبلها بكام شهر كان مرسي نفسه موجود في فندق فيرمونت اللي في أبراج النايل تاورز، اللي مبني على انقاض مصادر رزق اهالي الرملة، بيقدم وعود للقوى السياسية انه هيحكم بالتوافق وهينحاز للثورة، مهم تعرف ان مندور انحاز دائما للي ساكنين في العشش تحت الأبراج، ومصدقش ابدا اللي مجتمعين فوق في القاعات.

اللي حابسين مندور فاهمين الكلام ده كويس جدا، ومش بعيد يكونوا حابسينه للسبب ده بالضبط، مندور محبوس لأنه لا يمكن يتفق مع الفريق ولا الوزير ولا القاضي ولا المأمور، والحرية لمندور لأنه دايما مع المظلوم والمطحون.

هامش عن النضال في صمت:

كثير من اللي كتبوا عن مندور اتكلموا عن نضاله في صمت، ومجهوليته الاختيارية. صحيح ان مندور كان عازف عن الظهور الاعلامي حتى ان توفر، لكنه مختارش الصمت ابدا، مندور كان عايز يسمع الجميع صخب مطالب ومظالم الأحياء بالاسم فقط، ملايين عندهم بدل المظلمة الف، وتتنوع ظروفهم وتتنوع رؤيتهم للحلول.

أغلبكم مسمعش عن مندور مش عشان هو بيعمل في صمت، اغلبكم مسمعش عنه عشان فرض الصمت على الناس اللي هو تضامن مع نضالهم، عشان الاعلام يملكه اللي بيبنوا الأبراج بفلوسهم مش اللي بيبنوا العشش بسواعدهم، عشان الأحزاب بتتقابل في الفيرمونت اللي اتبنى على انقاض الرملة وبتقعد مع العسكر اللي سرق ارض القرصاية، عشان كثير مننا بينسى اهالي السلام اللي اعتصموا جنب ماسبيرو اسابيع واسابيع.

النهاردة بنكتب عن مندور عشان نكسر الصمت ده، عشان نكسر الصمت عن مظلمة الحبس الاحتياطي في الفاضي والمليان، عشان نكسر الصمت عن الاعتقال العشوائي، عشان نكسر الصمت على ألاف المعتقلين اللي اكيد اغلبهم لا مجرم ولا بيشكل خطر بما أن كثير منهم متاخد بالغلط اصلا،و عشان نكسر الصمت عن القضايا اللي بيناضل عليها مندور.

#الحرية_لمندور #الحرية_لأحمد_مندور

 

 

كتب المدون والناشط الشهير علاء عبدالفتاح هذه التدوينة في مذكرة “نوت” على صفحته بموقع فيس بوك في 14 نوفمبر، متحدثاً عن أحمد مندور الناشط اليساري الذي تم اعتقاله بالخطأ مع الإخوان في احداث رمسيس التي تلت فض رابعة. علاء يفسر أسباب اعتقال السلطة لمندور، ويعدد الفوارق بين من اختار مثله العمل على قضايا الفقراء والمهمشين، وبين الإخوان وسواهم من النخب.

لقراءة النص الأصلي وتعليقات القراء:
http://on.fb.me/1dC1Rog